பிஞ்சு மனசு

பஞ்சு முட்டாய் வேணாம் – ஒரு

பென்சில் லப்பர் போதும்

பர்பி காசு வேணாம் – ரண்டு

பாட நோட்டு போதும்

சினிமா கொட்டாய் வேணாம் – ஒரு

சிலேட்டு கொண்டா போதும்

சின்னதா அதில் கிறுக்க ரெண்டு

பலபம் கொண்டா போதும்

லட்டு திங்க வேணாம் லாலி

பாப்பும் கூட வேணாம்

லொங்கு லொங்குனு இஸ்கூல் போயி

படிச்சு வந்தா போதும்

தம்பி சுமக்க வேணாம் – என்

பைய சுமந்தா போதும்

பாப்பா பாக்க வேணாம் – என்

பள்ளிய பாத்தா போதும்

மேச சேரு வேணாம்

மண்ணு தரையிருந்தா போதும்

குண்டு பல்பு வேணாம்

குட்டி விளக்கிருந்தா போதும்

மச்சு வீட்டு புள்ளய போல

பச்ச சொக்கா வேணாம்

அது படிக்கும் பெரிய இஸ்கூலில்

ஒரு இடம் கிடைச்சா போதும்……

இதை நான் எழுதக் காரணமாய் அமைந்தது, இன்றைய ஹிந்துவில் வெளிவந்த  RTE தொடர்பான இந்தக் கட்டுரைதான். நம் தலையெழுத்து அவ்வளவுதான் என்று பெற்றோர் நொந்து கொண்டாலும், பெரிய பள்ளியில் படிக்கப் போவதாகக் கற்பனை கோட்டை கட்டி வைத்திருக்கும் அந்த எண்ணற்ற பிஞ்சு மனங்களின் ஏமாற்றத்திற்கு யார் பதில் சொல்வது?